सावन के झड़ी

अशोक कुमार यादव मुंगेली
धुँक-धुँक के गिरत हे झिमिर-झिमिर पानी।
गरजत हे बादर, छम-छम नाचे बरखा रानी।।
हाथ-पाँव ह ठिठुर गे, देंह ह कँपकपावत हे।
मनखे मन के सादा दाँत ह किनकिनावत हे।।
सूक्खा नदिया, नरवा मन दउंड़ेला धरलिन।
खंचवा,डबरा,बांधा अउ तरिया मन भरगिन।।
डोलिया अउ बहरा के मुंही-पार ह भंगलागे।
कोंवर-कोंवर पाना दिखे रूख-राई हरियागे।।
मछरी मन नाचे लगिन, केकरा बाजा बजावय।
बिला के अहिरू-बिछरू सुनके जम्मों आवंय।।
घुरघुरा गरतुर बंसुरी बजाथे घपटे रात अँधियारी।
होली खेलत हें मेचका मन धरे हवंय पिचकारी।।
नांगर जोतागे खेत-खार, किसान के भाग जागे।
खुमरी पहिन के बनिहार, रोपा लगयेला आगे।।
चना, तिवरा के होरा अउ जोंधरी म पेट टन होगे।
आंसो सावन के झड़ी म सिरतोन मन मगन होगे।।